“لك باعو مشفى الكندي بعد ما باعو حلب والرقة ..حتى اللادقية برسم البيع … وفي تحت جرمانا خمس طعشر نفق .. يا اخي شهداء عدرا كلن من الطائفة الهندوسية .. وباعو معلولا ..وفي واحد باع بنتو كمان .. وفي حاجز لداعش جنب حاجز الجوية كل يوم الصبح بيتبادلو السلام والقبلات والتبريكات.. وصفحة اسرائيل بالعربية كتير لذيذة .. وحتى أفيغدور أدرعي انسان ذكي بالحرب النفسية..”
أخي المهرطق الوطني .. أنا ما بستبعد كلامك بس إذا ما عندك دليل يدعم كلامك .. لك كرمال الله سكوت ….. إذا ما عندك أسماء وتفاصيل وبس عم تنشر اشاعات ..وك كرمال كونفوشيوس وحمورابي وشريعة هالغابة .. روح العب بالمزرعة السعيدة يا اخي .. أو انغري بيرد.. يعني “العصافير الغاضبة” كتير لذيذة هاللعبة .. بتشلح العصفور عالقرد.. اذا ما صبتو بتخسر .. واذا خسرت بيصير يضحك عليك .. ويكبّر عليك .. بترضى قرد يكبّر عليك..؟؟
حطلنا شعر.. قصيدة نثر.. نزار قباني .. صورة مايا دياب بالأندر وير.. نحنا بحرب صعبة .. ساهم فيها بشكل ايجابي.. يا أخي ..اشتري لطفل نازح حقيبة مدرسية .. أو لحشة وطاقية.. تظاهر ضد القيادة العليا اللي باعت حلب أمام محافظة اللاذقية .
يا أخي “بو” تعبان .. “بو” جوعان ..”بو” خريان .. روح حممو وطعميه ونضفو ونيمو لـ “بو”.. وخليه يحلم أحلام سعيدة .. بس لا تحلم أبد انك تأثر على معنوياتنا .. وشكرا ..
سيريان تلغراف | كيان جمعة – فيسبوك
(المقالة تعبر عن رأي الكاتب، وهيئة التحرير غير مسؤولة عن فحواها)